E la Navi d’oru va…
Centu corpa di cannuna
arriviglianu l’Ennisi
propriu oggi u dui dû misi
si festeggia la Patruna
Madunnuzza Matri ranni
quanta fudda pi la via
quantu genti a pedi ’nterra
câ preghiera Ti ringrazia
p’un miraculu ’na grazia
supplicati e ricivuti
pi ’na sufferenza amara
dâ persuna c’hai cchiù cara
quantu braccialetti e aneddi
appuntati nâ vistina
di ’sta Matri ’sta Bammina
di ’sta Stidda e occhi beddi
E la Navi d’oru va
’ncapu i spaddi traspurtata
di li Nudi ’nvesti bianca
di li banni accumpagnata
san Micheli e san Giuseppi
li stinnardi azzurri e bianchi
li carusi e i virgineddi
li rusarî e a litania
a lu gridu Viva Maria
pi li strati angusti e stritti
tapezzati ’i finisciuna
chini di coperti bianchi
di merlettu oppuri ’i sita
d’unni partunu a cannisci
rosi e sciuri ’mprofumati
chiovi amuri ’ncapu a vara
di la nostra Matri cara
ntê vaneddi li mascuna
palloncini colorati
picciriddi ’mbrazza ê matri
Un diadema tuttu d’oru
di smiraldi di rubini
di turchisi acquimarini
a timpesta di brillanti
rilucenti sfaviddanti
cu lu suli i stiddi a luna
pari fatta ’sta curuna
T’incurnicia a facci amata
si a Regina dî regini
Matri nostra ’mmaculata
E la Navi d’oru va
pi li strati ’i ’stu paisi
pi Tia Matri di l’Ennisi
tutta ’nfesta è la città
E chiancennu Ti pregamu
Tu ni guardi e ni surridi
ni riinchi u cori ’i fidi
di ducizza e d’umiltà
Ne lu celu li palummi
fannu voli d’allegria
disignannu un cori ranni
lu Tô cori o Maria
Geppina Macaluso
Poesia tratta dalla silloge:
Comu acqua di surgiva, Target Editrice Enna 1999
